Ադրբեջանցիները տեսանյութ են տարածել, որի «հերոս»-ին որպես «ՀՀ ԶՈՒ զինծառայող» են ներկայացնում

Ադրբեջանական լրատվամիջոցները՝ այդ երկրի Պաշտպանության նախարարության մատուցմամբ, տղամարդու մասնակցությամբ տեսագրություն են տարածել, որին ադրբեջանական կողմը որպես «ՀՀ ԶՈՒ զինծառայող» է ներկայացնում։ Տեսագրությունում արձանագրված է հարցաքննությունը։ Անմեղսունակ թվացող կասկածյալը կոտրատված հայերենով հայտնում է, որ ինքը Զավեն Հովհաննեսի Կարապետյանն է, ծնվել է 1974 թվականի նոյեմբերի 16-ին, Նոյեմբերյանի շրջանի Դովեղ գյուղում։ Նրա պնդմամբ՝ ինքն այնտեղ է բնակվում։ Տղամարդը «խոստովանում է», որ պայմանագրային զինծառայող է եւ նախօրեին իբր թե դիվերսիայի է մասնակցել։ Նշենք, որ ավելի վաղ, ՀՀ պաշտպանության նախարարությունը Հայաստանի ԶՈՒ զինծառայողի գերի ընկնելու մասին հաղորդագրությունները ապատեղեկատվություն է անվանել։